Vëllezër e motra “të përndjekur”, “të dëbuar” nga shtëpitë, “të zhveshur nga çdo gjë”.
Janë të krishterët e Mosulit dhe në përgjithësi të Irakut, siç u shpreh Papa, me rastin
e lutjes së Engjëllit të Tënzot të së dielës. Papa u lut edhe një herë për pajtimin
në Irak, ku mbizotëron dhuna, nën sulmet e xhihadistëve të Shtetit islamik. “Krim
kundër njerëzimit”. Për përndjekjen e të krishterëve në Mosul nga xhihadistët e Isis-it
dhe nga grupet e armatosura lidhur me formacionin ekstremist, foli edhe sekretari
i përgjithshëm i Kombeve të Bashkuara Ban Ki-moon. Pas djegjes, në Irak, të pallatit
ipeshkvnor të siro-katolikëve, gjatë orëve të fundit islamistët e Kalifatit islamik
të vetëshpallur kanë zaptuar manastirin e lashtë të Mar Behnamit, afër Karakoshit,
deri tani nën kujdesin e murgjërve siro-katolikë. Këtë e pohoi edhe kryeipeshkvi siro-katolik
i Mosulit, Yoanna Petros Moshe, për agjencinë Fides. Për emergjencën e të krishterëve
të Mosulit, sot është në program në Ankawa, afër Erbilit, në Kurdistanin irakian,
mbledhja e ipeshkvinjve lokalë me diplomatët e huaj dhe me politikanët e vendit. Ndërsa
në mbarë Irakun vijon dhuna dhe sulmet, me 16 viktima vetëm gjatë natës së kaluar
në Mahmudije dhe në Abu Graib, pranë Bagdadit, mbijetesa e bashkësisë së krishterë
të Irakut duket gjithnjë e më e rrezikuar. Edhe kryeministri irakian, Nuri al Maliki,
u bëri thirrje të gjitha vendeve të botës të “reagojnë të bashkuar kundër krimit të
fundit të shtetit islamik, që i ka dëbuar me forcë të krishterët e Mosulit”. “Dhimbja
për fatin e dëshpëruar të shumë njerëzve të pafajshëm është e pamasë” – tha edhe kardinali
Leonardo Sandri, prefekt i Kongregatës Vaikanase për Kishat Lindore. Për situatën
në vend, radio Vatikani foli me ipeshkvin ndihmës të Bagdadit Saad Sirub: Disa
familje kanë shkuar në veri, drejt Kurdistanit; të tjera drejt Erbilit e të tjerat
në fshatrat e krishtera në rrafshin e Ninivës. Pra këto familje janë shpërndarë në
vende të ndryshme sot. Janë në kushte shumë të vështira, sepse nuk kanë asgjë: u kanë
rrëmbyer makinat, paratë, shtëpitë dhe u kanë hequr punën. Nuk munden as të kthehen.
Pra, situata është shumë kritike: nevojitet një ndërhyrje e ngutshme për t’i ndihmuar
këto familje për të kapërcyer tragjedinë.