Irak. Ipeshkvi Sirub flet për dëbimin e të krishterëve
“Kemi mbetur pa fjalë, sepse çfarë po ndodh këtu është me të vërtetë tronditëse. Të
krishterët janë në Mosul prej shekujsh dhe këto familje detyrohen papritur të ikin
nga qyteti i tyre, nga shtëpia dhe jeta e tyre. Jemi me të vërtetë të shqetësuar për
të ardhmen e të krishterëve në këtë vend”. Është dëshmia dramatike e ipeshkvit ndihmës
kaldeas të Bagdadit, Imzot Saad Sirub (Syroub), menjëherë pasi familjet e fundit të
krishtera, që kishin mbetur në Mosul, u detyruan ta braktisin qytetin. “Nuk kishte
ndodhur kurrë që të krishterët të dëboheshin nga shtëpitë e tyre, si të mos kishin
asnjë të drejtë” – pohon ipeshkvi në një bisedë me Shoqatën Katolike të Shtypit, shpërndarë
nga agjencia Fides. “Fatkeqësisht kjo është sot gjendja në Irak, mbi të gjitha në
Mosul” - nënvizon prelati. “Frika jonë më e madhe po vërtetohet dhe nuk dimë si të
reagojmë. U bë tepër kohë që në Irak nuk ka siguri dhe njerëzit janë të terrorizuar,
veçanërisht besimtarët tanë”. Imzot Sirub i bën thirrje bashkësisë ndërkombëtare të
ndërhyjë tek qeveria irakiane për gjetjen e zgjidhjeve konkrete: “Po të ishte më e
qëndrueshme gjendja e brendshme, nuk do të kishte hapësirë për këta grupe fanatikësh,
që mëtojnë të na qeverisin vendin. Pastaj, duhen ndihmuar këta njerëz të gjorë, që
nuk kanë më shtëpi as katandi. Është me të vërtetë një tragjedi”.