Izraeli fillon operacionin nga toka. Hamasi: gati për reagim
“Më vjen keq që, pavarësisht nga përpjekjet e mia e të shumë liderëve rajonalë e botërorë,
një konflikt, edhe më parë i rrezikshëm, është intensifikuar akoma më tepër”: ky është
komenti i Sekretarit të Përgjithshëm të OKB-së, Ban Ki-Mun, i cili kritikon ndërhyrjen
tokësore të Izraelit në Rripin e Gazës. Në këtë çast, sulmohet zona veriore me tankse
e këmbësori. Për presidentin palestinez Mahmoud Abbas “ofensiva do ta shtojë gjakderdhjen”. “E
prisnim me ankth këtë sulm, për t’i dhënë një mësim të mirë” Izraelit, komentojnë,
ndërkaq, fondamentalistët e Hamasit. Sipas qeverisë izraelite, e cila e filloi operacionin
pak para orës 23.00 të natës së djeshme, synimi nuk është rrëzimi i Hamasit, por shkatërrimi
i infrastrukturave, nga të cilat hidhen raketat e predhat drejt territorit hebre,
sidomos prishja e tuneleve në kufi, që përdoren jo vetëm si depo armësh, por edhe
si kalim për milicë integralistë. Pas fletushkave të shpërndara nga izraelitët, ku
i kërkohej popullsisë së Gazës të largohej, shumë nga palestinezët ikën nga shtëpitë
e tyre, por ata, që s’mundën, janë fshehur edhe poshtë rrënojave. Megjithatë, fillojnë
të numërohen viktimat e para, ndër të cilët edhe një fëmijë i sapolindur e rreth 30
të plagosur.