Takimi i Papës Françesku me viktimat e shpërdorimit seksual: konferencë për shtyp
e atë Lombardit
Pas takimit të Papës Françesku me grupin e gjashtë viktimave të shpërdorimeve seksuale
të klerit, pak pas mesditës, drejtori i Sallës së Shtypit të Vatikanit, atë Federiko
Lombardi, mbajti një konferencë për shtyp. Fillimisht, ai informoi gazetarët
për mbledhjen e djeshme të Komisionit Papnor për Mbrotjen e të Miturve, gjatë së cilës
u trajtuan disa çështje. Ndër to, propozimi për zgjedhjen dhe emërimin e anëtarëve
të rinj të Komisionit, që të përfaqësojnë zona të tjera gjeografike, si kulturën aziatike
dhe afrikane. Emrat do të shqyrtohen nga Ati i Shenjtë. U fol për statutet e Komisionit
dhe për nevojën e ngritjes së një zyre operative. Gjithashtu, sqaroi atë Lombardi,
kardinajtë diskutuan mundësinë e organizimit të grupeve të punës, me ndihmën e ekspertëve
të jashtëm. Takimi i ardhshëm i Komisionit parashikohet për në tetor. Më pas,
atë Lombardi shtoi disa hollësi për takimin e Papës Françesku me gjashtë viktimat
e abuzimeve seksuale, tre burra e tri gra, ardhur nga Gjermania, Irlanda dhe Mbretëria
e Bashkuar: “Erdhën në Shën Martë që gjatë ditës së djeshme. Prandaj, mbrëmë,
ndërsa hanin darkë në dhomën e ngrënies, Papa kaloi dhe i përshëndeti për të parën
herë. Sot në mëngjes, mesha, në orën 7.00. Pastaj, Papa jo vetëm i përshëndeti pjesëmarrësit
në meshë një e nga një, por hëngri mengjesin bashkë me ta e në orën 9.00 filluan takimet
personale”. Ishin vërtet mallëngjyese, nënvizoi atë Lombardi: “Papa
bisedoi personalisht, për mëse tri orë, me viktimat e shpërdorimeve seksuale nga ana
e anëtarëve të klerit, me stilin e zakonshëm të tij, në një takim shumë intensiv e
shumë të vëmendshëm”. Të pranishmit i shprehën Atit të Shenjtë mirënjohjen
e tyre të thellë për këtë bisedë të përzemërt: “Munda t’i shoh kur dolën dhe
fola shkurtimisht me ta. Mund të dëshmoj mirënjohjen e thellë, madje edhe mallëngjimin
e këtyre njerëzve, për mundësinë e takimit nga afër, kaq të përzemërt, kaq personal
me Atin e Shenjtë. Në veçanti, e kuptuan fort mirë se u dëgjuan me kujdes e me shumë
vëmendje. Papa dëshmoi se dëgjimi të ndihmon të kuptosh e si të thuash, edhe të përgatisësh
rrugën për rigjetjen e besimit, për shërimin e plagëve”. Papa Françesku, shtoi
drejtori i Sallës së Shtypit të Vatikanit, na dha kështu një mësim të mirë, duke e
konsideruar dëgjimin e viktimave si etapë thelbësore në udhën e zgjidhjes së problemit
të abuzimeve: “Gjëja më e rëndësishme është se kjo mund të bëhet shenjë, model,
shembull, sepse kur Papa i kushton shumë kohë, shumë kujdes, merr pjesë shpirtërisht
në çastin e dëgjimit, jep një mesazh të qartë për këdo: duhet të dimë të dëgjojmë,
t’i kushtojmë kohën e nevojshme njeriut, në mënyrë që ai të zbulojë shpirtin e vet
e të hyjë në atë udhë komunikimi, që bëhet premisa e rrugës së shërimit e të pajtimit
personal. Kjo kthehet më pas në pasuri për gjithë bashkësinë. Fakti që njerëzit gjejnë
udhën për të arritur qetësinë, pajtimin me vetveten e me fenë, në marrëdhënie me Kishën
e me bashkësinë, është sigurisht pasuri, rezultat shumë pozitiv”. Edhe për
Papën Françesku takimi me gjashtë viktimat e shpërdorimeve seksuale të disa anëtarëve
të klerit ishte prekës. Dëshmon atë Lombardi: “E pashë në fund. Edhe ai ishte
shumë i prekur, sepse për çdo njeri, çdo meshtar, çdo bari që përjeton një bisedë,
një takim të kësaj natyre me njerëz, të cilët kanë pas shpine një histori vuajtjesh
të thella, kjo është jashtëzakonisht impenjative. E Papa e përjetoi këtë. Natyrisht,
është njeri që ia ka kushtuar jetën dëgjimit si bari shpirtrash, prandaj nuk është
hera e parë, që përballon një bisedë të tillë”.