Jemi në fund të kapitullit të dytë të Ungjillit sipas Markut dhe Jezusi është përsëri
në udhë me nxënësit. Nga tregimi i Markut mund të kuptojmë se nxënësit ndjehen të
lirë me Jezusin dhe sillen tashmë sipas frymës së tij. Ata e dinin rëndësinë e së
shtunës, por këpusin kallinjtë e grurit pa frikë se po thyenin ligjin e Moisiut. Nga
i njëjti tregim mësojmë se Jezusi dhe nxënësit janë nën vëzhgimin e autoriteteve fetare
të Izraelit, të cilët e pyesin Mësuesin “pse [nxënësit] bëjnë çfarë nuk lejohet të
shtunën” (Mk 2,24). E shtuna është
dita e fundit e krijimit të botës, në të cilën Hyji reshti së krijuari dhe pushoi.
Njëri nga dhjetë urdhërimet, që mori Moisiu në malin Sinai, thotë: “Kujtohu ta shenjtërosh
ditën e shtunë. Gjashtë ditë puno dhe kryej të gjitha punët e tua, kurse e shtata
ditë është e shtuna e Zotit, Hyjit tënd. Mos bëj kurrfarë pune ti, as biri yt, as
bija jote, as shërbëtori yt, as shërbëtorja jote, as kafsha jote, as i huaji, që banon
tek ti. Sepse gjatë gjashtë ditëve Zoti bëri qiellin e tokën e detin e gjithçka gjendet
në to e pushoi ditën e shtatë. Prandaj Zoti e bekoi ditën e shtatë dhe e shenjtëroi”
(Dal 20,8-11). Pushimi i së shtunës, sipas traditës biblike, duhet kuptuar si një
shenjë e fortë e ngjashmërisë së jeriut me Hyjin. Kush nuk e shenjtëron të shtunën,
bie në skllavërinë e gjërave të botës dhe humbet epërsinë që duhet të ketë njeriu
mbi botën e krijuar. Puna është e lidhur me nevojën e njeriut për të jetuar në këtë
botë, ndërsa pushimi është tregues i një nevoje të tjetër, që gjendet thellë brenda
nesh: i nevojës për Hyjin. Farisenjtë i kapin nxënësit e Jezusit duke bërë “punë”
ditën e shtunë. Janë duke ecur me Jezusin nëpër arat me grurë dhe këpusin disa kallinj.
“Pse bëjnë çfarë nuk është e lejueshme?” – e pyesin. Jezusi i befason me përgjigjen
e tij, jo vetëm sepse u citon rastin e Davidit nga Besëlidhja e Vjetër, por sepse
paraqitet si ai që ka autoritetin e plotë për të shpjeguar kuptimin e të shtunës:
“E shtuna u krijua për njeriun dhe jo njeriu për të shtunën” (Mk 2,27). Jezusi e vendos
njeriun edhe një herë në qendër të krijimit, aty ku njeriu kishte qenë para se të
hynte mëkati në botë. “Biri i njeriut është Zot edhe mbi të shtunën” – shpall ai solemnisht,
duke treguar kështu, se është vetë autori i ligjit dhe se ligji nuk është dhënë për
të përligjur pushtetin fetar mbi ndërgjegjet e njerëzve, por për ta kthyer njeriun
edhe një herë në qendër të krijimit. Kështu ai e përsos ligjin.