Evangelii Gaudium – Dialogu shoqëror si kontribut për paqen
Në fund të kapitullit të katërt të thirrjes apostolike Evangelii Gaudium, Papa Françesku
flet për rëndësinë e dialogut shoqëror në të cilin duhet të angazhohet Kisha. Tre
janë bashkëbiseduesit e saj në shoqëri: shtetet, shoqëria, që përfshin kulturat dhe
shkencat, dhe besimet e tjera, që nuk bëjnë pjesë në Kishën katolike. “Në të gjitha
rastet Kisha flet duke u nisur nga ajo dritë që i jep feja, sjell përvojën e saj dymijëvjeçare
dhe runa gjithmonë në kujtesë jetën dhe vuajtjet e qenieve njerëzore” (n. 238). Subjekti
i dialogut nuk mund të jetë një elitë përfaqësuese, e cila mishëron në mënyrë shembullore
karakteristikat që duhet t’i përkasin popullit, por vetë njerëzit, me kulturën e tyre
dhe me traditën historike. Shteti kujdeset për të mirën e përbashkët, duke u mbështetur
në parimet e ndihmës dhe të solidaritetit. Në dialogun ndërmjet shtetit dhe shoqërisë
Kisha nuk zotëron zgjidhje për çdo detaj, por “bashkë me forcat e tjera shoqërore,
i shoqëron parashtrimet që mund t’i përgjigjen më mirë dinjitetit të njeriut dhe të
mirës së përbashkët” (n. 241). Në veprën e ungjillëzimit Kisha duhet të mbajë hapur
dialogun mes fesë, arsyes dhe shkencave. Nëse pozitivizmi shkencor i përjashton format
e tjera të njohjes dhe të dijes, Kisha tregon një rrugë tjetër, rrugën e ndërthurjes
së përdorimit të metodologjive të shkencave eksperimentale me dijet e tjera, si filozofia,
teologjia dhe vetë feja. “Feja nuk ka frikë nga arsyeja, përkundrazi, e kërkon dhe
ka besim tek ajo, sepse si drita e arsyes, ashtu edhe ajo e fesë rrjedhin nga Hyji”
(n242). Kisha nuk synon ta ndalë përparimin e shkencës, madje gëzohet kur kjo e fundit
arrin në përfundime të rëndësishme për njerëzimin, por, në disa raste, shkencëtarët
dalin nga fusha e vet e dijes dhe mëtojnë të flasin për fenë duke u mbështetur në
metodologjinë e kërkimit shkencor. “Në këtë rast nuk është arsyeja ajo që flet, por
një ideologji e caktuar, që ia mbyll rrugën dialogut të vërtetë, paqësor dhe të frytshëm”
(n.243). Një vend të rëndësishëm në shërbimin ndaj paqes shoqërore zë edhe dialogu
ekumenik: “Duhet të kujtojmë gjithmonë se jemi shtegtare dhe shtegtojmë së bashku.
Për këtë qëllim duhet t’ia hapim zemrën shokut të udhës, pa dyshime, ma mosbesime
dhe duhet të shikojmë para së gjithash atë që kërkojmë: paqen në fytyrën e Hyjit të
vetëm” (n. 243). Ndarja ndërmjet të krishterëve e bën më të vështirë rrugën e paqes,
sepse e dobëson forcën e dëshmisë. Për kapërcimin e ndarjeve Papa bën këtë parashtrim:
“Nëse përqendrohemi tek bindjet që na bashkojnë dhe nëse kujtojmë parimin e hierarkisë
së të vërtetave, do të mund të ecim me shpejtësi drejt formave të përbashkëta të ungjillëzimit,
të shërbimit dhe të dëshmisë” (n. 246). Një tjetër element i rëndësishëm është ai
i kujdesit ndaj dhuratës së veçantë që Shpirti i Shenjtë i ka dhënë secilës Kishë
të krishterë, që mund t’u shërbejë edhe të tjerave. Si shembull, Papa përmend kolegjialitetin
në Kishën ortodokse. Edhe dialogu me hebrenjtë është shumë i rëndësishëm: “Si
të krishterë nuk mund ta konsiderojmë hebraizmin si një fe të huaj, as nuk duhet t’i
përfshijmë hebrenjtë tek ata që janë të thirrur për të braktisur idhujt, për t’u kthyer
tek Hyji i vërtetë” (n. 247). Dialogu me bijtë e Izraelit është pjesë e jetës së nxënësve
të Jezusit. Një vend të rëndësishëm, në fund të përsiatjes së Papës për shërbimin
ndaj paqes shoqërore, që duhet të kryejë ungjillëzimi, zë edhe dialogu ndërfetar,
“kusht themelor për paqen në botë” (n. 250). Nuk bëhet fjalë për dialog teknik dhe
diplomatik, por për bashkëbisedim të hapur rreth jetës njerëzore. Gjatë këtij bashkëbisedimi
“nuk duhet lënë kurrë pas dore lidhja e qenësishme ndërmjet dialogut dhe shpalljes
së Ungjillit” (n. 251). Sinkretizmi pa qartësi do të ishte totalitarizëm, sepse do
të flijonte vlerat që shkojnë përtej mundësive tona për t’i diskutur, duke mos qenë
ne pronarët e atyre vlerave. “Hapja e vëretetë kërkon që të mbetemi të vendosur për
bindjet më të thella vetjake, me një identitet të qartë dhe të gëzueshëm, por të hapur
për të kuptuar identitetin e tjetrit dhe të vetëdijshëm se dialogu mund ta pasurojë
secilin” (n. 251). Në dialogun ndërfetar zënë një vend të veçantë marrëdhëniet me
islamin. Papa kërkon që emigrantët islamikë të priten mirë në vendet me traditë të
krishterë, por u bën thirrje edhe vendeve islamike që t’i pranojnë të krishterët “duke
mbajtur parasysh lirinë që gëzojnë në Perëndim besimtarët e Islamit” (n. 253). Liria
fetare është e domosdoshme për procesin e paqes shoqërore. Ajo realizohet duke i dhënë
fesë vendin që i takon në shoqëri, pa e detyruar të mbyllet brenda ndërgjegjeve individuale
apo ndërtesave të kultit.