Siri. Gregori III: rënimi i kishave të Maalulës, krim i vërtetë
Shkatërrimi i kishave të Maalulës është përkufizuar nga patriarku greko-melkit katolik
i antiokisë Gregori III Laham “krim i mirëfilltë lufte”. Patriarku shkoi të dielën
në fshatin historik të të krishterëve, të cilin ushtria siriane e çliroi nga forcat
e frontit islamik “Al-Nosra”. “Është misteri i së keqes, të cilin e shohim në verpim”,
tha patriarku, i cili mezi gjeti fjalët për të shprehur hidhërimin përballë pamjeve
të shkretimit. Patriarku greko-katolik e vizitoi fshatin bashkë me patriarkun greko-ortodoks
Youhanna Yazigi dhe me përfaqësuesit e patriarkateve siriako-ortodokse, armeno-ortodokse
dhe siriako-katolike, në shoqërinë e disa gazetarëve dhe të punonjësve të sigurisë.
Në të njëjtën ditë u takua me kreun e shtetit sirian, i cili gjithshtu kishte shkuar
për të vizituar fshatin e rrënuar. “Na u paraqit një shfaqje apokaliptike. Në Siri
janë rrënuar edhe kisha të tjera, por nuk kisha parë kurrë diçka të tillë. Më zuri
vaji dhe kërkova më kot një vend të vetmuar për t’u lutur. Jam i dërrmuar”, tha prelati
i lartë. “Janë rrënuar të katra kishat historike të Maalulës. Muret e kishës së
famullisë sonë, kushtuar shën Gjergjit, janë shpuar gjithandej. Kupola e kuvendit
është çarë në dy vende dhe disa pjesë rrezikojnë të shemben, prandaj duhen rindërtuar.
Ikonat i kanë hedhur përtokë, i kanë ndotur ose vjedhur dhe ndërtesa është e pabanueshme”.
“Në kuvendin e Shën Sergjit dhe Bakut, altari historik pagan, i shuguruar si altar
i krishterë, i vetmi i llojit të vet, është çarë më dysh”. E njëjta shfaqje shkretimi
del para sysh edhe në Kishat e Shën Elisë dhe Teklës, që i përkasin patriarkatit greko-ortodoks.
Gregori III mendon se shkatërrimi i Maalulës është “krim i organizuar” dhe “krim
i mirëfilltë lufte”. Karta e Londrës (1946) përkufizon si krime lufte “plaçkitjen
e të mirave publike ose private, shkatërrimin pa arsye të qyteteve dhe fshatrave ose
shkretimin pa arsye ushtarake”. Me hidhërim në zemër, Gregori III e akuzon botë perëndimore
se është e verbër ndaj të vërtetës së luftës në Siri. Sipas tij nuk gjendemi aspak
përballë një “lufte siriane” apo një “lufte civile”. Sigurisht, një pjesë e luftës
është mes myslimanëve, por nuk është luftë e islamit me krishtërimin. Është “krim
i organizuar”.