Imzot Krajevski u çon dhuratën e Papës të pastrehëve të Romës
Të premten në mbrëmje, në sa në Koloseum kremtohej Udha e Kryqit, lëmoshtari i Papës,
imzot Konrad Krajevski dhe imzot Diego Raveli, ceremonier papnor, shkuan në zonat
rreth Stacionit Termini, Shën Marisë së Madhe dhe Ostienses, për t’u çuar të pastrehëve
një zarf me urimet e Pashkëve nga ana e Papës Françesku e edhe një ndihmë financiare,
nga paratë e mbledhura prej Pergamenave me Bekimin Papnor për raste të ndryshme, të
cilat tashmë i kanë kujtim edhe shumë shqiptarë: kujtim pagëzimi, krezmimi, martese,
përvjetoresh në shenjë… Dje paradite, të njëjtën
dhuratë e morën rreth 30 gra, të strehuara këto ditë në Shtëpinë “Dhurata e Marisë”,
në Vatikan, drejtuar nga misionaret e Nënë Terezës, edhe kjo e mirënjohur nga shumë
shqiptare të strehuara këtu me raste të ndryshme. Në këtë mënyrë Papa pothuajse e
zbrazi fare arkën e Lëmoshtarit të vet. Nga lëmoshtari, në xhep elëmoshtarëve,
që u çuditën nga kjo e papritur e gëzueshme. Nuk u kishte shkuar as nëpër mend se
dikush do të mendonte për ta. E jo vetëm do të mendonte, por do t’ua shprehte afërsinë
me një ndihmë konkrete. Imzot Krajevski kujtoi se Papa e dërgoi t’i kërkojë të
varfërit, të mos rrijë pranë shkritores, madje, ta shesë fare, që ta mundë kështu,
tundimin për të ndenjur në zyrë. Nisma, pohoi, u mor pas predikimit të Atë Kantalamesës,
në kremtimin e Mundimeve të Krishtit, në të cilën kapuçini predikatar ngriti me forcë
zërin kundër idhujtarisë së parasë, që vijon t’i hapë plagë të rënda njerëzve të djersës
së ballit, në të katër anët e botës. Duke shpjeguar me një realizëm tronditës situatën
e sotme, Predikatari theksoi: “Pse të çuditemi për këtë shpjegim e të na
duket tepër i rëndomtë. A nuk ka qenë gjithnjë kështu e kështu është edhe sot e kësaj
dite? Mamona, paraja, nuk është një nga idhujt, është idhulli për antonomazi… E
kriza financiare, që po kalon bota, a nuk shkaktohet kryekreje nga etja e pak njerëzve
për të grumbulluar sa më shumë para? Kështu e nisi edhe Juda rrugën tradhtisë; duke
vjedhur para nga arka e përbashkët. A u kujton gjë kjo tradhti, ca administratorëve
të parasë? A nuk u duket kriminale, që disa të marrin njëqind fish më shumë, se ata
që punojnë nën vartësinë tyre? A nuk u vjen turp, kur ngrenë në kupë të qiellit zërin,
po u prekën sadopak interesat e tyre? E po u fol për drejtësi shoqërore?”. Kështu
u shpreh Atë Kantalamesa, në kujtimin e Darkës së Mbrame të Zotit, e Papa i bëri jehonë
predikimit, duke u çuar të varfërve dhuratën e papritur. Kur lëmoshtarët iu afruan,
disa prej tyre po shtronin për dhe kartonat, krevat i akullt në këtë pranverë të vonuar.
U prekën aq, tregojnë lëmoshtarët, sa nisën të hedhin valle nga gëzimi, duke falënderuar
Provaninë Hyjnore.Imzot Krajevski, që ka përgatitur këto vjet 14 Udhë Kryqi, pohoi
se sivjet e bëri Udhën e Mundimeve me të pastrehët e Romës, në emër të Françeskut!