Bukuria e mistershme: Mikelanxhelo Buonarroti, në 450-vjetorin e vdekjes, me fjalët
e Papës Pali VI
Kremtohet sot, 450-vjetori i vdekjes së Mikelanxhelo Buonarrotit, i cili lindi në
Kapreze Mikelanxhelo më 6 mars 1475 dhe ndërroi jetë në Romë, më 18 shkurt 1564. Protagonist
i padiskutueshëm i Rilindjes Italiane, i famshëm në të gjithë botën për kryeveprat
në skulpturë, si Davidi e Moisiu; në arkitekturë, si Kapitoli i Romës me sheshin e
tij të famshëm, në mesin e të cilit ngrihet statuja e Mark Aurelit, e në pikturë,
si Gjykimi i Mbramë, që zbukuron pjesën e fundit të Kapelës Sikstine. Viti 2014 i
kushtohet pikërisht këtij artisti të madh e do të karkaterizohet nga veprimtari të
shumta e të pasura, që do t’i shoqërojnë artdashësit deri në dhjetor 2014. Ndër
më kryesoret, nga 18 shkurt deri më 18 maj 2014, në Galerinë e Akademisë së Firences
“Të ri-njohim Mikelanxhelon”, ndërsa deri në prill, në Shtëpinë-muze të Vasarit në
Firence, mund të vizitohet ekspozita “Marrëdhëniet ndërmjet Mikelanxhelos e Vasarit
në letra e vizatime”. Po në Firence, në Shtëpinë Buonarroti, do të hapen dy ekspozita:
“Forca e mitit – projektet për fasadën e Shën Lorencit në Firence” (18 mars – 2 qershor
2014) dhe “Mikelanxhelo e vitet ‘900” (18 qershor – 20 tetor 2014). Po e kujtojmë
sot artistin e madh toskan, skulptor, piktor, arkitekt, e madje edhe poet, me fjalët
e Papës Pali VI, që i vë në dukje jo vetëm aftësitë, por edhe forcën shpirtërore,
që e ndihmoi të bënte kryevepra, si Kapela Sikstine, katekizëm i vërtetë për çdo vizitor. “Na
pëlqen ta imagjinojmë artistin – thoshte Papa në homelinë e meshës për 500-vjetorin
e lindjes së Mikelanxhelos - duke u sjellë në hapësirat solemne arkitektonike, të
cilat e panë për vite të gjata, në periudha të ndryshme të jetës e në momente të ndryshme
të veprimtarisë artistike, mbi skelat e punës, në shoqëri me poemën e tij të jashtëzakonshme
në pikturë, për të cilën, ashtu si për poemën e Dantes, bashkëpunuan qielli e toka.
Kush i sheh ato sekuenca pikture, pyet veten ç’marrëdhënie mund të ketë me ne ai popull
figurash energjike: ne vijmë pas disa shekujsh e si shoqëria, ashtu edhe bota e krishterë,
kanë probleme shumë më të ndryshme se atëherë. E megjithatë, Sikstina na jep, si të
thuash, një raport mbi luftën e fitoren, gati një botë ‘in fieri’(në zhvillim), ku
bijtë e dritës, për hir të karakterit sakramentor të tyrin, luftojnë me guxim e pa
u lodhur për triumfin e së vërtetës. Këtu, më tepër se kudo, format janë në funsion
të drejtpërdrejtë të ideve fetare. Mund të qëndrojmë të mahnitur para turmës së Sikstinës,
evokuar nga gjenia e Mikelanxhelos, por nuk mund të lihet mënjanë dëgjimi i Fjalës
[së Zotit], e cila dallohet aq mirë në sjelljen e trupave e në shprehjet e fytyrës:
ka engjëj, profetë, Apostuj, Papë, martirë, dëshmitarë të fesë, bota e Sibilave. Mbizotëron
sovrane, figura e Zotit, e një Hyji të drejtë e të mëshirshëm, që njerëzimit të prishur,
i ofron ndihmën e shëlbimit për një jetë të re. Lidhja, në skenarin e pamasë, është
Bibla, që del në pah me vlerat e saj të shenjta përmes imazheve, të cilat, me gjuhën
e tyre figurative, i japin një kontribut poezie e profecie ekzegjezës së teksteve
kishtare. Mikelanxhelo është protagonisti, demiurgu i këtij predikimi të madh
fetar, që ne, jo më pak se njerëzve të kohës së tij, na duket i mrekullueshëm për
guximin e konceptimit ikonografik e për fuqinë shprehëse. Nuk ka fjalë njerëzore,
që mund të zgjojë kaq emocione, që të bën të reflektosh e të meditosh kaq thellë,
sa paraqitja e e atyre të vërtetave nga Buonarroti. Kapela Sikstine, me Gjykimin e
Mbramë (apo Gjykimin Universal), bëhet kështu, gati një libër i hapur për njerëz të
mësuar e për mendje të pakultivuara, për besimtarë e jo besimtarë, si edhe një thirrje
e frytshme për popullin e Zotit që të vazhdojë të jetojë siguritë e Ungjillit, për
të mos rënë si ‘foshnja, përplasur nga tallazet e doktrinave, që me dredhi i hapin
udhën gabimit’(Ef 4,14-15) ”.