Pakistan: lutje e protesta të të krishterëve pas masakrës në kishën anglikane të Peshauarit
Lutje nëpër kisha, protesta në rrugë, shkolla e dyqane të mbyllura në shenjë zie.
Kështu e shprehën të krishterët pakistanezë, dhimbjen, trishtimin e gjendjen e tyre
shpirtërore pas atentatit në kishën anglikane të të Gjithë Shenjtorëve, të dielën
në Peshauar. Sipas bilancit të fundit, numri i viktimave është 82 vetë, ndër të cilat
34 gra e 7 fëmijë, ndërsa numri i të plagosurve ka arritur në 145. Dje, në qytetet
kryesore të Pakistanit, si Islamabad, Lahore, Karaçi dhe Peshauar, kortezhe besimtarësh
u kërkuan autoriteteve më shumë mbrojtje, duke u kujtuar se ata janë qytetarë pakistanezë
me të drejta të plota. Në Karaçi, pavarësisht nga kundërshtimi i krerëve fetarë,
ndodhën përleshje ndërmjet të krishterëve e myslimanëve jashtë një xhamie e një person
humbi jetën. Ipeshkvijtë katolikë u bëjnë thirrje besimtarëve të kenë durim e të ruajnë
qetësinë, pa e shndërruar zhgënjimin e tyre në dhunë. Në Islamabad, po dje, mëse 600
manifestues bllokuan rrugën kryesore për orë e orë, ndërsa 2 mijë të tjerë u mbodhën
në protestë para parlamentit. Në Peshauar, 200 vetë manifestuan, duke bllokuar arterien
kryesore të qytetit, ndërsa një grup prej 100 besimtarësh kërkoi “drejtësi e mbrojtje”
para kishës anglikane, në të cilën ndodhi atentati. Provinca, që e ka Peshauarin si
kryeqytet, ka shpallur tri ditë zie. Të gjitha veprimtaritë tregtare të të krishterëve
janë ndalur e takime lutjeje janë organizuar në disa qytete të provincës, me pjesëmarrjen
e dy bashkësive të krishtera, asaj anglikane e asaj katolike.